ஏன் இந்தத் திடீர் மாற்றம்?

மகனே உன்னிடம்
ஏன் இந்த திடீர் மாற்றம் ?
அந்த நாள் வந்தது ஞாபகம் ,
உன் உடலிலே எண்ணெய்த் தடவ ,
குட்டிச் சட்டியுடன் நிற்பாயே!
மிதமான சூடுடன் விளாவி ,
ஆசையுடன் முதுகைத் தேய்க்க
சுகமாகக் காட்டுவாயே!
இப்போது ஏன் இந்த மாற்றம்
என்னை விலகி ஓடுகிறாய் ?

உன் தலைமுடியைக் கோதி ,
இரு கன்னத்தை அசங்காமல் பிடித்து ,
உன் சுருட்டைமுடியை நீவ
சமத்தாகக் காட்டுவாயே .
இன்று உன்னைப் பார்க்கிறேன்
பல நாட்கள் வாராத முடி
குருவியின் கூடு கவிழ்த்தாற்போல்
அடிக்கடி முடியால் ஒரு கண் மறைய
கைகளால் பலதடவைகள் கோத
கழுத்துவரை முடி பரவ
கண்ணா ஏன் இந்த மாற்றம் ?
என்னை விலகி ஓடுகிறாய்?

மொறு மொறுவென்று
உருளைக்கிழங்கு வதக்கி .
சுடச்சுட குழம்பு சாதம்
உன் தட்டில் வைக்க
நீ உண்ணும் அழகை நான் ரசிக்க
அப்படியே உன்னை அணைத்து
உச்சி முகர்ந்தேனே .
அந்த நாட்கள் இனி வருமா ?
இன்றும் உன்னை
அணைக்கத் துடிக்கின்றேன்.
ஏன் இந்தத் திடீர் மாற்றம் ?
ஏன் விலகிப் போகிறய் ?

பள்ளியிலிருந்து ஓடி வருவாய் ,
பல கதைகள் பேசுவாய் ,
என் மடியில் தலை வைத்து
களைப்பில் தூங்கி விடுவாய் ,
கால் வலித்தாலும்
உன் தூக்கம் கலையாமல் இருக்க
அசையாமல் அமர்ந்திருப்பேனே .
ஆனால் இன்றோ
காலேஜிலிருந்து வருகிறாய்
சன்னலில் தவம் செய்கிறாய்.
நண்பர்கள் இடையில் மறைகிறாய் ,
வண்ணச் சிட்டுக்கள் உன்னைச் சூழ
முகம் மலர ரசிக்கிறாய் .
ஏன் இந்தத் திடீர் மாற்றம்
என்னைவிட்டு விலகுகிறாய் ?

குழந்தைப் பருவம் முடிந்துப் போக
விடலைப் பருவம் தலைத்தூக்க
அதைப் புரிந்துக் கொள்ளாத நான்
உன்னைக் குழந்தையாகவே பார்க்கிறேன் ,
ஒரு வயதில் தந்தை இழந்தாய் .
நானே தந்தை ,நானே தாய் ,,,,,,
உனக்கென்று தனி வழி தேடி விட்டாய் ,
என்க்கென்ற ஒரு வழியைத் தேடவேண்டும் .
தாய்க்குப் பின் தாரமும் வருவாள்,,,,

எதிர்ப்பார்ப்பு இல்லாத வாழ்க்கை
நான் இனி தேட வேண்டும்
தன் காலால் நான் நிற்க
இன்மேல் பயில வேண்டும்
அன்பு என்ற உலகில்
வலம் வரவேண்டும்
மகனே நீ விலகினாலும்
நான் தெளிவாகி விட்டேன்